အာတပ္ပနကျမ်းလာ စစ်ချီအစီအရင်တို့ ကောင်း မကောင်း သိလိုပါသည်။
ရေမြေရှင်လျှောက်သည်ဆရာတော် ---
အာတပ္ပနဗေဒင်ကျမ်းကို ပါပကမင်းလက်ထက် မတရားသောပုံဏား ဇော်ဂီ တပသီတို့ညီ၍ တိုင်းမှုပြည်ရေး စစ်ချီစစ်ထွက် အနှိပ်အကွပ် အဖျက်အဆီး အခြိမ်းအချောက် အရောက်အလာအမှုတို့ကို စီရင်ရာတွင် မဟာယတရာအာတပ္ပနကျမ်းသမုတ်၍ အဆက်ဆက် စစ်ချီစစ်တိုက်မင်းတို့ သုံးဆောင်သည်။ သားတော်မြေးတော်တို့ကို ချီသွားစေလျှင် အလုံးစုံမျိုးတို့ကို ပေးအပ်၍ ဆောင်ရသည်။ ကောင်းသော အကြောင်းတို့ကိုလည်း သည်အာတပ္ပနဗေဒင်ကျမ်းတွင် လာသလော၊ မကောင်းသက်သက်သာ လာသလော။ ရန်သူတို့၏အမှီကို ဖျက်ဆီးသောအရာ နဂိုမူ၍ ချီသောတပ်က စီရင်သောအချက်တို့ကို မသိသာ သိသာအောင် စာသွင်းတော်မူပါဆရာတော်။ ။
ဆောင်တော်မြဲဖြစ်သော ဦးကေတုကို စေတော်မူသည်။
မှာလိုက်သည်ကား ---
အာတဗ္ဗနဗေဒင်သည် မဟာယတရာကျမ်းကြီးဖြစ်သည်။ လူမိုက်တို့အား မသိစေအပ်။ ထိုလူမိုက် တို့အား ဤကျမ်းကို အကုံအလုံးစုံတတ်ချေလျှင် ရေမြေရှင်စည်းစိမ်ကိုပင် ပျက်စီးကြေမွအောင် တတ်နိုင် ချေသည်။ ရေမြေရှင်မေးတော်မူသည်အကြောင်းမှာ ကိုယ်တော်ပြင်အခြားတို့ကို မသိစေအပ်။ နှလုံးတော် စွဲ၍သာ စီရင်ခင်းစီရင်ဖွယ်တို့တွင် ရန်ဆူးရန်ညောင့်တို့ကို အဖျက်အဆီး အနှိပ်အကွပ် အချိုးအဖဲ့ စေတော်မူလျှင် ထုံးစံနည်းနာ စီရင်ရိုးတွက်ရိုးကို မပြမပေးအပ်ချေ။ ဝမ်းတွင်သစ္စာမြဲ၍ သတိဂတိနှင့် အကျိုးတော်ကို အလိုရှိလှသူတို့ကို စီရင်စေ၍ အပြီးကိုသာ အပ်တော်မူ၊ အာတဗ္ဗနဗေဒင်အဟောင်းတွင် အသက်ရှည်သောအရာကို တိုစေ၍ အကောင်ပုတ်ဖြစ်ခြင်း၊ စီးပွားတော်ကိုယုတ်စေခြင်း၊ ဆင် မြင်းနာစေခြင်း၊ သေစေခြင်း၊ အကြံအစည်ကောင်းတို့ကို မကောင်းဖြစ်စေခြင်း၊ မိုးကြိုးလောင်မီးပစ်စေ ကျစေခြင်း၊ ဘုရားပုထိုး ရောင်တော်ပြစေခြင်း၊ သစ်ကြီးလဲ၍ မြေကြီးပင်နိမ့်ရိုင်စေခြင်း၊ မြို့တခါး ပြကြီး ပြငယ်တို့မှစ၍ အဆောင်ကန္နား ဆောက်လုပ်အပ်သောသစ်သားနှင့်စပ်သမျှ အုတ်ရိုးနှင့်စပ်သမျှတို့ကို ကွဲစေခြင်း၊ ပြိုစေခြင်း၊ မြို့ရိုးရိုင်စေခြင်း၊ ပြိုစေခြင်း၊ စေတီပုထိုးမှစ၍ ထီး စိန်ပွင့် မှန်ကင်းတို့ကို လေမခပ်ဖဲသော်လည်းကောင်း၊ လေခတ်စေ၍သော် လည်းကောင်း၊ ကျွတ်စေခြင်း၊ ကျစေခြင်း၊ ခိုးသူမုဒိန်းပေါ်စေ၍ မြို့ရွာသို့ဝင်စေခြင်း၊ ကောင်းကင်၌ ကြယ်ချင်း ခြင်းစေခြင်း၊ လတွင်းသို့ ကြယ်ဝင်စေခြင်း၊ နေကြပ်စေခြင်း၊ လကြပ်စေခြင်း၊ အကြောင်းမရှိသည်တို့ကို ဖြစ်စေနိုင်သည်။
ကောင်းကင်၌ ကြယ်တခွန် လတခွန် နေတခွန်အခိုးတို့ကို ဖြစ်စေနိုင်သည်။ မကောင်းသောတိတ်၊ မကောင်းသောနိမိတ်တို့ကို ပေါ်ထွက်စေခြင်း၊ ရန်ဆူးရန်ငြောင့် အနှောင့်အရှက် ပေါ်ထွက်စေကြောင်းကို ဆောင်နိုင်သည်။ အရာများရှိသောကြောင့် ထင်ရှားအောင်လျှောက်စာမသွင်းသာ၊ သိတော်မူရအောင် ကိုမူကား ရှေ့ဆယ့်ကိုးရက်မှ ပါဠိအနက်အဓိပ္ပာယ်နှင့် ရေမြေရှင်သိသာရုံ ရဟန်းသင်္ဃာတို့နှင့်လျှော်သမျှကို သွင်းရတော့ မည်။ မဟာဓမ္မရာဇ်တရားမင်းမြတ်။ ။
(သက္ကရာဇ် ၁၀၅၀-ခု၊ ကျိုင်းတုံသို့သားတော် မင်းရဲရန္တသူကို ဗိုလ်မှူးခန့်၍ ချီမည်တွင် မေးတော်မူသော အရာကို မြိုင်တွင်ဝတောကျောင်း ဇမ္ဗူဒီပဓဇမဟာဓမ္မရာဇဂုရုဆရာတော် သွင်းသည်။ )
0 comments:
Post a Comment